Monday, January 07, 2008

New Look

أنظر... أنظر جيداً... أعد النظر...
نعم، أنت لست بمخطئ... أنا عملت نيولوك للبلوج بتاعى...
هي الخطوة دى كنت عايز اعملها من ييجى سنة مثلاً، وبالذات انى كنت باتحسر كل ما اخش على البلوجات التانية وألاقى الناس بتعمل لينكات وتحط أغانى وفيديوهات، وأنا زى الحمار ولا عارف بيعملوا ده ازاى، ع العموم انا لسه برضه زى الحمار في الموضوع ده ماحصلش فرق، انما النيولوك اتعمل بفضل الأستاذة مى كامل، هي تولت الموضوع بصراحة من الألف للياء، وكمان طبقت المثل الصينى الشهير بتاع ماتدينيش كل يوم سمكة انما علمنى ازاى اصطاد، فعلمتنى ازاى اعمل لينكات للناس عندى وازاى ممكن اغير شكل البلوج (كنت غيرته بس الشكل الجديد ماعجبنيش فرجعت للقديم)... وهكذا، شكراً يا أستاذة مى، وعلى وعد للسادة القراء (صحابى اللى بيخشوا يعنى) انهم يجدوا ما يسرهم في البلوج قريباً.

---------------------------------------------------------------------------------------------

ع الهامش: النهاردة ركبت المترو كالمعتاد، كنت من يوم الخميس اللى فات ماركبتوش، يعنى انقطعت عنه تلات ايام بس، لأفاجئ عند رجوعى بحاجة عليا النعمة من نعمة ربى مانا فاهمها، عربيتين السيدات اتنقلوا من الأول للنص، طيب ليه؟، الأسخف إن العربيتين اللى في النص همة اللى قدام سلم المترو، وده معناه ان لو حد نازل مستعجل حينط جوا العربية، سيدات بقى ولا عفاريت مش حيهمه، والأسخف من ده كمان إن على ما يبدو ماحدش لسه استوعب الهبل ده، فكانت النتيجة انى ماشفتش النهاردة عربة للسيدات، كل العربيات كان فيها رجالة وستات على بعض.. طيب برضه ليه؟ حد يقدر يفسر الهبل ده؟

أحمد بدوى