Sunday, July 27, 2008

بسببه..


أكيد شئ مؤسف انى بعد الغياب الطويل ده عن المدونة أرجع بتدوينة اتكلم فيها عن يوسف شاهين فى يوم وفاته، كأنى بانعيه، الحقيقة انا ماكنش عندى أدنى رغبة فى الكتابة عن أى شئ، وحتى خبر وفاته لما عرفته الصبح ماهزنيش قوى، ماكنش غايب عن حد ان يوسف شاهين بيحتضر، ويمكن عشان كده ماتصدمتش ولا اتهزيت لما عرفت الخبر الصبح، بس بعد شوية اتنبهت فجأة على حاجة كانت غايبة عنى، وهى ان فى احتمال لو ان يوسف شاهين ماكنش اتوجد فى حياتى كان زمانى دلوقتى بأفكر فى أى حاجة تانية غير السينما.
صحيح انا من صغرى غاوى أفلام، اتفرج واتخيل وأعيش مع الأبطال، لكن اللى حببنى فى السينما بالذات كانت أفلام يوسف شاهين، يمكن لأنى حسيت انه الوحيد الصادق فى أفلامه، يعنى لما تتفرج على فيلم ليه، وترجع تشوفه هو نفسه فى لقاء تليفزيونى مثلاً تلاقى ان الفيلم هو نفسه يوسف شاهين، مش جزء منه، ومش مجرد فكرة مؤمن بيها أو بيدعى انه مؤمن بيها زى بعضهم إنما ده هو بذاته، يعنى يوسف شاهين هو بابا أمين وهو اسكندرية ليه وهو اليوم السادس... إلخ، اللى باقوله ده مش تحليل أو نقد، ده مجرد تذكر لانطباع قديم أخدته عن يوسف شاهين وأفلامه لما شفتها لأول مرة فى حياتى، وخلتنى أبدأ اهتم بانى أعرف يعنى ايه مخرج، وإيه دوره فى العمل السينمائي، وايه الفرق بين مخرج والتانى، بسببه ابتديت اهتم بإنى ماكتفيش بالفرجة على الفيلم انما ادخل جوا كل تفصيلة فيه وأحاول أفهمها، بسببه جت أول محاولة ليا عشان أكتب فيلم، بسببه جت أول محاولة ليا عشان أكتب نقد، وبسببه حتى قريت عن حاجات كتير ماكنتش اتخيل انى اقرا عنها، ده انا قريت كتب لابن رشد بسببه.
يمكن مع مرور السنين ابتديت أعرف ايه المدارس السينمائية، وسعيت انى أصنف المخرجين اللى أعرفهم داخل المدارس دى، ومع الوقت عرفت ان السينما اللى باحبها وباميل ليها بشكل شخصي بعيدة عن أفلام يوسف شاهين، لكن بالرغم من كده لسه أفلامه جوايا جزء منى مش قادر أنساه أو ابعده عن نفسي، مش قادر كل ما آجى أفكر فى مشهد أو لقطة من أى فيلم لحد غيره انى ماقارنهاش باللى كان بيعمله مع ان مفيش اى وجه للمقارنة....
مش حأقدر أنسي نور الشريف فى حدوتة مصرية لما كان بيقول انه مش مسلواتى وخلانى أعرف انى انا كمان لازم مابقاش مسلواتى، مش حأقدر أنسي الألم اللى كنت باحسه لما بيطلق المجاميع عشان تعترض على قرار التنحى فى فيلم العصفور وايه معنى انك تشتم واحد من كتر ما بتحبه، مش حأقدر أنسي الفرحة المريضة وهو بيزعق بعلو صوته "كات.. قفشناها" فى فيلم اسكندرية كمان وكمان، مش حأقدر أنسي أكبر مراية شفتها فى حياتى واللى اسمها عودة الابن الضال لما شفت فيها أبويا وشفت أهلى وشفت الشارع بتاعنا وحتى شفت نفسي، مش حأقدر أنسي أيام ماكنت فى اعدادى وكانوا بيشحنونا فى المدرسة بشحنات كراهية عمياء للآخر أياً كان، ولليهود بشكل خاص، ومع ذلك ماقدرتش امنع نفسي من البكا فى المشهد اللى كان يوسف وهبى بيودع فيه اسكندرية فى فيلم إسكندرية ليه... آه كنت حانسي حاجة، حتى حبى لاسكندرية اللى اعتبرها ألذ مكان فى فيلم اليوم السادس... كان برضه بسببه.
-----------------------------------------------------------------
ع الهامش: كنت دايماً باسمع مثل بيقول ان المتشائم عمره ما بيصدم، وعمرى ما حسيت ان المثل ده صح لأنى كنت طول عمرى متفائل، بس فى الفترة الأخيرة مابقتش متفائل ولا حتى متشائم، بقيت لا مبالى، وطبيعي أكون كده إذا لقيت ان اللى مابيتعبش ومابيجتهدش بياخد مكان اللى بيتعب ويجتهد، طيب يبقى ليه أصلا اتعب نفسى واجتهد فى أى حاجة، بس المشكلة انى برضه ماعرفش شغل السرقة والكروتة، وبالتالى فأفضل شئ انى أكون لا مبالى، مش كده؟!!

أحمد بدوى

9 comments:

Amr said...

الجزء الأخير هو اللي هعلق عليه عشان لسة كاتب من كام تدوينة عندي إن لامبالاتي بقت سلاحي في الفترة الحالية
خلينا لامبالين والدنيا ماهياش مستاهلة

shaw said...

يوسف شاهين مات..خبر 3 سطور في الصفحة الأولى للصحف اليومية وصفحة داخلية (أو أقل) عنه أو عن تأبين الرئيس مبارك له بمعنى أدق..وممكن يجيبوا كام فيلم في التليفزيون وبح كده!!
وده يوسف شاهين!!
نبالي ليه بقى ياحج أحمد

Mai Kamel said...

ع الهامش هو اكثر ما جذبني
واستغربتله اوي
مش استغربت من المكتوب
بس استغربت من كونك انت اللى كتبته
...

سوووكا said...

يوسف شاهين اكيد ليله افلام حلوة
بس انا مش معجبينه للأمانة
ومش حنخش في تفاصيل ليه
بس مااختلفش انه كان مخرج شاااطر جدا

اهممم زي ماقلتلك على الشات اللامبالاة ديه سبب وكستنا احنا نون النسوة يارب تكون خرجت منها العمر مش بعزقة ماتضربووووش الجيل الجديد مننا كفاية اللي انضرب زي حالاتي بسبب الدلع بتاعكوااااااا ؛ يالا شد حيلك وحوشهم رزم رزم اساتك اساتك ؛ عشان تتجوز في القريب وترحم واحدة مسكينة من لقب عانس
يخربي كده ؛ ده تسول

هههههههههههههههه
هههههههه

والله واحشاني ايام الكلية اوي ؛ ووحشاني اوي دفعتي

ولا يهمك

Known as PHYSCO said...

برة النَص .. أخيرا شفت فيلم الهروب وأنا سعيدة جدا جدا جدا .. عقبال أرض الخوف يارب

حبيت أعلن الخبر ده هنا ده بعد إذنك طبعا :)
رمضان كريم

Ahmed Elkas said...

البوست كان فى يوليو احنا فى اخر اكتوبر عشان كدة انا مش جاى اعلق على موضوع البوست انا بس جاى اقولك انت بطلت تدوين ولا ايه

مع تحيات .. الجهاز القومى للتعبئة والاحصاء .. وجمعية ييجوا اللى عايزين الخلف يتفرجوا

model said...

تصور انا مش من الفانز ليوسف شاهين اللهم اذا استشثنينا فيلم صلاح الدين و لكن ىاحترم تقديرك له كمااني لا اسمع معظم من تسمعهم باستشثناء فيروز
و لكن تقريبا اتفق مع ذوقك فيمن تحب رؤيتهم او كثير منهم
لكن عجبتني فكرة مدونتك مش كلها دش
انا مدونتي اسمها عايزة اخس

بيتهيالي محتاجة تطوير
استفدت من المرور عندك
موديل

Unknown said...


thx

شركه تنظيف

Unknown said...


thx

كشف تسربات المياة
غسيل خزانات
شركة نظافة عامة