Thursday, October 11, 2007

عامان فى جودنيوز سينما

دى رابع مرة اتكلم فيها عن حاجة شخصية، تالت مرة كانت إجابتى على التاج وتانى مرة كانت ذكرياتى عن زهرة شباب دفعة 2007، أما أول مرة فكانت بمناسبة مرور سنة على أول حاجة تتنشرلى في مجلة جودنيوز سينما

الحمد لله عدت سنتين عليا في المجلة اللى عمرها 3 سنين، ولسه مبسوط بالمجلة وبادعى إن شاء الله إنها تستمر حتى لو انا ماستمرتش فيها، كمان لسه عند رأيي كقارئ ودارس صحافة إنها المطبوعة الفنية المصرية الوحيدة اللى انا شايف انها جديرة بالاحترام، والأهم انى اتعرفت كويس على طاقم المجلة عندنا أكتر من السنة اللى فاتت، وبجد انا بابقى سعيد لما بتكلم مع أي حد منهم في حاجة تخص السينما، انا فعلياً باتعلم منهم لسه، ومبسوط بده، بس من طاقم المجلة اللى اتعرفت عليه كله تقريباً لازم أقول ان اكتر ناس انا باحب اتكلم معاهم وباحس انى باستفيد همة علاء كركوتى ومحمد رجاء (وده بغض النظر عن إن رجاء أكتر حد في المجلة بيحصل بينى وبينه شد وجذب يعنى)، ده بالاضافة طبعاً لوائل حمدى اللى له أفضال عليا في حاجات كتير قوى وكنت قلت في المرة اللى فاتت انه الأب الروحى بالنسبة لى فيما يتعلق بشئون السينما (مش عارف ليه حاسس انه لو قرا الأب الروحى دى ممكن يشتمنى)، ع العموم المجلة بالنسبة لى حاجة من أجمل الحاجات اللى حصلت في حياتى، كفاية ع الأقل إنها بتخلينى أعمل الشغل اللى انا باحبه، واللى بابقى في قمة السعادة لما حد مايعرفنيش شخصياً ييجى ويقولى ان شغلى كويس وعجبه.
وبمناسبة الشغل انا قلت ان اول حاجة نزلتلى في عدد أكتوبر 2005 كانت مقالة نص صفحة، المقالة كانت عن فيلم أيام السادات، وبعد كده بسنة في اكتوبر 2006 نزلى اول ملف كامل، كان عن نجيب محفوظ، والملف ده رغم انه يمكن الحاجة الوحيدة في كل شغلى اللى ماحدش علقلى عليها، إلا إن له معزة خاصة عندى، وللصدفة السنة دى إن شاء الله في عدد أكتوبر 2007 برضه نازلى ملف، الملف ده أصبح برضه من الحاجات المميزة بالنسبة لى اللى عملتها (مع انى عارف انه حيلاقى نفس مصير ملف نجيب محفوظ)، بس عموماً أكيد حارجع واتكلم عن الملف ده بعد نزوله، لأن لو في حد مهتم بالسينما فعلاً فلازم يهتم بموضوع الملف ده.
----------------------------------------------------------------------------------------

ع الهامش: كل مرة باتفرج على فيلم حربى أمريكى أو أوروبى، باسأل نفسى احنا ليه مانفكرش نعمل فيلم حربى مصرى عدل، وكل مرة كنت مش بالاقى إجابة منطقية، بس أخيراً وصلت لاستنتاج معين، وده لما حاولت اتخيل شكل فيلم حربى، فالمعروف ان الأفلام الحربية بيبقى فيها أبطال كتير، ولما حاولت أتخيل شكل الأبطال بتوعنا (بتوع الفيلم مش بتوع الحرب) لقيت ان الخيارات اللى حتبقى قدامى غالبا حيبقى فيها هانى سلامة وأحمد الفيشاوى وخالد أبو النجا، هنا حصلت لحظة التبصر وفهمت ليه ماينفعش نعمل فيلم مصرى حربى.

أحمد بدوى

4 comments:

MHMD KORNA said...

(فالمعروف ان الأفلام الحربية بيبقى فيها أبطال كتير، ولما حاولت أتخيل شكل الأبطال بتوعنا (بتوع الفيلم مش بتوع الحرب) لقيت ان الخيارات اللى حتبقى قدامى غالبا حيبقى فيها هانى سلامة وأحمد الفيشاوى وخالد أبو النجا، هنا حصلت لحظة التبصر وفهمت ليه ماينفعش نعمل فيلم مصرى حربى.)

ههههههههههههههههههههههههههههه
ههههههههههههههههههههههههههههه


ربنا يوفقك كمان وكمان يا عم أحمد

Cheb Amadou said...

ماهو صحيح، تخيل خالد ابو النجا كده مكان مارلون براندو فى فيلم نهاية العالم الآن، أو أحمد الفيشاوى مكان توم هانكس فى إنقاذ المجند رايان.

ههههههههههههههههههههههههههههههه

ويوفقك انت كمان يا عمنا

Anonymous said...

Hi ya a7mad de awel mara 2day ad5ol 3la ur blog,w 2areet mawdo3en bs till now bs bayn eno heya gamda kaman 3agebny awy ur cinematic culture as i'm fond of cinematic art w awel mara a3raf enak btkteb fe goodnews w yareet b2a tn2el el mwade3 ely etnasharetlak aw goz2 mnha hena (law yenfa3)3shan i really thnk enaha 7tkon gamda i'll keep looking up here for new posts,thnx & Go On.

Cheb Amadou said...

مارو:
متشكر جداً على التعليق الجحميل ده، وآسف انى اتأخرت فى الرد بس السبب معروف طبعاً وهو أزمة النت القومية، ع العموم هو أكيد ينفع انى انقل الحاجة اللى كتبتها فى المجلة هنا، بس انا ماعملتش ده قبل كده بصراحة لأن عندى اقتناع ان اللى بيتنشر فى المجلة هو شغل، إنما اللى باكتبه ع البلوج ده مزاج شخصى لا يخلو من الانطباع أحياناً، والحمد لله على ما اعتقد ان مستوى ده مايقلش عن مستوى ده، لكن الفرق بس فى المود بتاع الواحد لما بيكتب.
البلوج نور وياريت تعدى مرة تانية