تاج عتيق جداً

دخلت من حوالى أسبوع في دوامة شغل مرعبة، كنت مطحون فعلاً، بس الحمد لله خلصت الشغل، وساعة ما خلصت الشغل ده كنت خلاص بانهج، كأنه كان شغل بدنى، بس بالرغم من كده كنت طبعاً مبسوط بيه وعقبال ما اللى يقراه يتبسط كمان ان شاء الله، المهم، في قلب دوامة الشغل دى كان في شوية أحداث كويسة حصلت يمكن كان أحلاها خروجة تريانون الأزهر بارك اللى زقزوق قال عليها في مدونته مع ايهاب وأحمد عبد الحميد ومحمد جلال وزقزوق طبعاً، وكمان مكالماتى في التليفون مع حد اتعرفت عليه من فترة كمصدر صحفى بس مع الوقت بقينا اصحاب أو ع الأقل انا معتبره كذلك وهو يوسف هشام وهو مخرج أفلام مستقلة للى مايعرفهوش، وختام الأسبوع امبارح لما رحت حضرت عرض الفيلم المستقل "عين السمكة" لأحمد خالد وقابلت هناك عدد كبير من الزملا والصحاب بالصدفة ومن غير ما ننسق مع بعض، ماحدش كان رايح معايا غير الصديقين زوزة ومى، وزوزة بقى عمل معايا أحلى واجب، جابلى على فلاشية بتاعته لعبة الاستراتيجى اللى باعشقعا "آج أوف امباير" اللى كانت اتمسحت عندى من مدة طويلة وكنت حاموت ألعبها واهوه زوزة الحمد لله حققلى الأمنية من غير ما أموت، بس في نص كل الأحداث دى كنت كل شوية بافتكر التاج اللى عمرو زقزوق كان بعتهولى من زمان وانا ماجاوبتوش بتاع خمس حاجات ماحدش يعرفهم عنك، كنت الأول باقول انى كتاب مفتوح يعنى ماعنديش حاجة ماحدش يعرفها عنى غير حاجات نادرة، بس لما ركزت شوية لقيت انى كده فعلا لكن في حاجات الناس ماتعرفش سببها، ممكن مش كلهم، بعضهم أو معظمهم، ليه افتكرت التاج ده..ماعرفش، بس عموماًَ دى الحاجات الخمسة اللى اعتقد إن ماحدش يعرفهم عنى:

أول حاجة: انا عارف انى في بعض أحيان باقصر مع صحابى، بس متأكد انى عمرى ما بعت حد، وباحافظ عليهم قوى وباعتبرهم كنز، لكن ده مش لأنى أخلاق ولا متدين ولا أي حاجة من الكلام ده، الحكاية وما فيها انى وحيد وماعنديش اخوات، فبالتالى انا باعتبر اى صديق جديد بالنسبة لى زى اخ وأكتر، وكمان (ودى مشكلة) أنى باثق في كتير منهم، الحمد لله معظمهم كانوا حتى الآن محل ثقة، بس اللى بيخونى انا باقلب عليه جامد جداً، لأنى باعتبره خان أخ ليه، وحتى الآن مفيش حد خاننى في حاجة إلا وخدت حقى منه وبزيادة قوى، ممكن انه هو نفسه مايعرفش انى خدت حقى منه بس المهم انى بابقى انتقمت لنفسى، أصل زى ما بيقوله لما أخ يزعل من أخوه بيبقى ولا أشرس عدو.

تانى حاجة: لو حد جابلى شنطة فيها مليون جنيه وقاللى خدها ليك وجيت رايح اخدها قاللى تانى خدها ليك وعلى بال ما وصلتلها قاللى تالت خدها ليك حامسكها وارميها في خلقته، لكن لو حد جه قاللى ادينى عينك اليمين وسكت ممكن افكر انى اديهاله فعلاً، م الآخر انا باكره الالحاح في أي حاجة حتى لو ليا فايدة من ورا الملحوح عليه، ليه انا باكره الالحاح انا ماعرفش، ياريت يبقى حد يقولى ليه. بالمناسبة المثال اللى في الأول ده مش حقيقية طبعاً مش ادى عينى لحد وحاخد المليون جنيه طبعا.

تالت حاجة: اللى عارفنى ممكن يكونوا بيقولوا من ورايا ويمكن من قدامى أحياناً انى عندى هوس بالأنثى..تحديداً جسم الأنثى، كلامهم صح، بس ده مش مرض زى ما بعضهم ممكن يتخيل، العملية وما فيها ان جسم الأنثى هو مرادف عندى لكلمة الجمال اللى هو بالنسبة لى الحياة، واعتقد ان اى انسان بيشوف كده حتى الاناث، وإن كان الكلام ده بيحجب عادة في العقل اللاواعى، لكن ايه تفسير ان الرجال الوسماء في نظر البنات همة اكتر ناس ملامحهم بعيدة عن الملامح الذكورية، وايه تفسير ان قزازة الحاجة الساقعة وعواميد النور وحتى مآذن الجوامع متصممة بشكل قريب من تكوين جسم الأنثى؟

رابع حاجة: كانت فيا عادة سخيفة وهى انى مابعرفش انافق ابداً، وده كان بيخلى ناس كتير تبعد عنى (هي سخيفة طبعاً لأن ده مش منطقى في مجتمعنا)، بس مع الوقت لقيت حل عشان اتغلب ع العادة دى غير انى انافق طبعاً، وهى انى اتجاهل اللى المفروض انافقه قدر المستطاع، وده برضه يفسر الصدام اللى ممكن يحصل بينى وبين ناس مرة واحدة مع ان ماكنش في يننا سابق معرفة شخصية اصلا.

خامس حاجة: اكتر حاجتين بخاف منهم في حياتى ان يجيلوا يوم ألاقى أفكارى خلصت وماعرفش اطلع أي فكرة جديدة، أو انى لما أعجز (لو ربنا ادانى عمر يعنى) حد يبصلى زى مانا ببص برضه بشفقة على أساس انى صعبان عليه يعنى.

أمرر التاج العتيق ده لـ:
محمد قرنة (زوزة)، مى كامل، أيمن الشربينى، محمود (زوف)
------------------------------------------------------------------------------

ع الهامش: هات شوية لحمة باردة وقطعهم قطع صغيرة، وهات عدد 2 أو 3حبة طماطم وقطعهم شرايح، وهات 3 فصوص توم وقطهم شرايح صغيرة جداً(أنا شخصياً باقطعهم بموس)، وممكن تزود فلفل او لأ، وحط شوية زيت زيتون فى طاسة ع النار، وحط الكلام اللى فات ده كله عليه، تلت ساعة تلاقى فى إيدك أكلة لذيذة جداً، اشمعنى الأكلة دى بقى، لأن بصراحة دى الحاجة الوحيدة اللى باعرف أعملها

أحمد بدوى