أكيد انا باحب السينما، وباحب أشوف الأفلام أيا كانت، وكمان شفت ولله الحمد أفلام مصرى كتير قوى قوى، وحبيت بسببها فريد شوقى وحسين رياض وأحمد مظهر ومحمود المليجى ومحمد فوزى وحليم، بس بجد في حاجات حصلت في أفلام للناس دى أو في أفلامنا عموماً بتخلى مرارتى خلاص حتتفقع، وانا مش باخاف انها تتفقع بس باخاف انها لو اتفقعت مش عارف ايه اللى حيتفقع بعدها عندى، المهم، دى يمكن اكتر حاجات باشوفها عموماً في أفلامنا وباحس انها ممكن تفقع مرارتى، يمكن عشان كانت سخيفة أو فيها حاجة غلط أو مرتبطة عندى بحاجة تانية بتخلينى افهمها دايما غلط، ماعرفش لكن ده اللى بيفقعنى عموماً.......
في فيلم رصيف نمرة خمسة، كل مرة باحاول اتوصل للمحلل النفسى المذهل اللى كان شغال في عصابة زكى رستم ومحمود المليجى، واللى اتأكد ان رد الفعل الأول لفريد شوقى على معرفة خبر وفاة بنته أنه يسيب البندقية الميرى
لما بتيجى أفلام نجمة الجماهير " نادية الجندى " في أي قناة بصراحة مش باقدر أغيرها، ماحدش يفتكر انى بأقعد اقول ايه الوحش في أفلامها وإيه الكويس (إن وجد)، انما بس باقعد اتأمل "نادية الجندى" وأسأل نفسى على أي أساس كل الرجالة اللى في الفيلم حايحين عليها؟
هي الأفلام اللى فيها حليم وفريد وفوزى، وحتى فؤاد وعطية وحمادة، ليه كلهم كانوا بيبصوا للفراغ وهمة بيغنوا؟، ثم كل أغانيهم بيبقى في مزيكا ولا مزيكة حسب الله وراهم، أمال ليه ماكوناش بنشوف ولا واحد من الفرقة في الخلفية؟ وازاى صوتهم من غير مايكات بيسمع الحارة والشارع والحى كله؟
اول ما اعرف ان فيلم "وااسلاماه" جاى، باسلك ودانى كويس قوى ومع ذلك سمعى بيخذلنى في كل مرة اشوف فيها حسين رياض بيقول أحمد مظهر "قعدت على كرسى العرش"، بصراحة انا مش باسمع حرف شين خالص، لكن باسمع حرف تانى قريب منه، ع العموم هو أكيد ماكانش يقصد حاجة وحشة.
عادى ان يبقى في فيلم مقتبس عن فيلم أمريكى للعبقرى آل باتشينو، وكان ممكن ابلع ان يقوم بدوره فاروق الفيشاوى أو حسين فهمى مثلا، لكن لغاية دلوقتى مش قادر اتخيل ان اللى يقوم بدوره في الفيلم المقتبس عن "العراب" يبقى نادية الجندى.
سؤال بس، مين اللى أقنع مدحت صالح بدخول مجال التمثيل؟ طيب بلاش ده، مين اللى أقنعه ان التلقائية في التمثيل انك تهز كتافك وانت ماشى؟
هو عماد حمدى لما كان بيقول جملته الشهيرة "يا مبارك"، كان عنده بعد نظر سياسى ولا جت معاه صدفة؟
هو ليه في الأفلام العربى والأجنبى كمان لما بيستخدموا الكومبيوتر مابيبقاش في ماوس وبيبقى كل شغلهم انهم يقعدوا يتكتوا ع الكيبورد؟
اكيد ممكن ان راجل يعمل دور واحدة ست، انما ازاى واحدة ست جميلة ومتفجرة الأنوثة تعمل دور واحد راجل؟ فلنفترض انها حتخبى نعومة وشها بشنب ودقن عيرة، طيب حتخبى الـ.... ازاى؟
أحمد رزق عامل دور داستن هوفمان...مش حاقول حاجة تانى.
25 سنة، هي المدة اللى لازم البطل يكون غابها عن حبيبته او ابنه في الأفلام المصرية، اقل من كده ماينفعش.
"أحلى حاجة في الأفلام العربى ان مافيهاش ترجمة عشان انا مش بالحق اقرا الترجمة" دى جملة سمعتها من واحد في المترو بيقولها لواحد صاحبه وهى مش من فيلم بس تستاهل يتعمل عليها فيلم طبعاً.
كفاية فقع بقى...............
في فيلم رصيف نمرة خمسة، كل مرة باحاول اتوصل للمحلل النفسى المذهل اللى كان شغال في عصابة زكى رستم ومحمود المليجى، واللى اتأكد ان رد الفعل الأول لفريد شوقى على معرفة خبر وفاة بنته أنه يسيب البندقية الميرى
لما بتيجى أفلام نجمة الجماهير " نادية الجندى " في أي قناة بصراحة مش باقدر أغيرها، ماحدش يفتكر انى بأقعد اقول ايه الوحش في أفلامها وإيه الكويس (إن وجد)، انما بس باقعد اتأمل "نادية الجندى" وأسأل نفسى على أي أساس كل الرجالة اللى في الفيلم حايحين عليها؟
هي الأفلام اللى فيها حليم وفريد وفوزى، وحتى فؤاد وعطية وحمادة، ليه كلهم كانوا بيبصوا للفراغ وهمة بيغنوا؟، ثم كل أغانيهم بيبقى في مزيكا ولا مزيكة حسب الله وراهم، أمال ليه ماكوناش بنشوف ولا واحد من الفرقة في الخلفية؟ وازاى صوتهم من غير مايكات بيسمع الحارة والشارع والحى كله؟
اول ما اعرف ان فيلم "وااسلاماه" جاى، باسلك ودانى كويس قوى ومع ذلك سمعى بيخذلنى في كل مرة اشوف فيها حسين رياض بيقول أحمد مظهر "قعدت على كرسى العرش"، بصراحة انا مش باسمع حرف شين خالص، لكن باسمع حرف تانى قريب منه، ع العموم هو أكيد ماكانش يقصد حاجة وحشة.
عادى ان يبقى في فيلم مقتبس عن فيلم أمريكى للعبقرى آل باتشينو، وكان ممكن ابلع ان يقوم بدوره فاروق الفيشاوى أو حسين فهمى مثلا، لكن لغاية دلوقتى مش قادر اتخيل ان اللى يقوم بدوره في الفيلم المقتبس عن "العراب" يبقى نادية الجندى.
سؤال بس، مين اللى أقنع مدحت صالح بدخول مجال التمثيل؟ طيب بلاش ده، مين اللى أقنعه ان التلقائية في التمثيل انك تهز كتافك وانت ماشى؟
هو عماد حمدى لما كان بيقول جملته الشهيرة "يا مبارك"، كان عنده بعد نظر سياسى ولا جت معاه صدفة؟
هو ليه في الأفلام العربى والأجنبى كمان لما بيستخدموا الكومبيوتر مابيبقاش في ماوس وبيبقى كل شغلهم انهم يقعدوا يتكتوا ع الكيبورد؟
اكيد ممكن ان راجل يعمل دور واحدة ست، انما ازاى واحدة ست جميلة ومتفجرة الأنوثة تعمل دور واحد راجل؟ فلنفترض انها حتخبى نعومة وشها بشنب ودقن عيرة، طيب حتخبى الـ.... ازاى؟
أحمد رزق عامل دور داستن هوفمان...مش حاقول حاجة تانى.
25 سنة، هي المدة اللى لازم البطل يكون غابها عن حبيبته او ابنه في الأفلام المصرية، اقل من كده ماينفعش.
"أحلى حاجة في الأفلام العربى ان مافيهاش ترجمة عشان انا مش بالحق اقرا الترجمة" دى جملة سمعتها من واحد في المترو بيقولها لواحد صاحبه وهى مش من فيلم بس تستاهل يتعمل عليها فيلم طبعاً.
كفاية فقع بقى...............
9 comments:
بجد صباح الضحك مش ممكن
حكاية الكومبيوتر دي فعلا بتفرسني، غير كدة اصلا بيتعاملوا مع الكومبيوتر على إنه مصباح علاء الدين اللي بيعمل كل حاحة، اللي بيجوز الناس وبيسكنهم في شقق ويشتري لهم عربيات وكله كله بطريقة ساذجة جدا
في فيلم الناصر صلاح الدين فيه استهبال تاريخي، غير موضوع عيسى العوام فيه فكرة إن صلاح الدين كان بيخوض الحرب "لتحرير العرب" وبغض النظر عن إن اللعب جه ممكن يكون مقبول من وجهة نظر ناس بس بجد أنا شيفه استظراف يعني
الموضوع مسخرة طبعاً يا ريس..
بالنسبة للكمبيوتر،فيه مسلسل متخلف شفت حلقتين منه كانوا جايبين في مشهد دنيا سمير غانم بتكتب بحث على الكمبيوتر..ضربات صوابعها على الكيبورد مش كتابة كلام أبداً..دا حد بيدوس على أي حروف بشكل عشوائي.
..
و المشهد الخالد في السينما المصرية لما حد يبقى فاهم التاني غلط و يزعق و بتاع و التاني ما يحاولش يوضح موقفه و يكتفي إنه يقول له طب خليني أوضحلك..طب اسمع مني!
:s طب ما تقول على طول يا جدع
..
فيه مشهد خالد كمان بيفقعني قوي..لما تبقى خناقة في خمارة و كل ما حد يلمس التاني تلاقيه طار 7 متر في الهوا و نزل على ترابيزة دشدشها..المشكلة لما يبقى اللي بيتضرب دا زي الثور و اللي بيضرب هوّ عادل إمام !
..
كان اتنين أعرفهم بيتكلموا على نادية الجندي فواحد بيقول للتاني نادية الجندي كل أفلامها زبالة،و لازم تصرّخ في كل فيلم ! التاني قال له فيلم مهمة في تل أبيب حلو..قال له عارفه..و اتعذبت في أخر الفيلم و صرخّت برضوا :d
..
من الجمل اللي فقعتني قوي برضوا جملة حنان ترك في فيلم الآخر بتاع يوسف شاهين..لما بتقول للبلبة.."خطبني تحت المطر !".
..
فريد شوقي فقيع في كل أفلامه..كونه طويل و عريض دا مش معناه إنه بيعرف يمثل.
..
أحلى حاجة في الأفلام العربي إنك مش لازم تشوفها من أولها ولا تشوفها لأخرها عشان تفهمها،نص ساعة بالكتير من وسط الفيلم كفيلة إنك تفهمه !
احمد.. انت كارثة بشرية سينمائية
بجد بوست فظيع بدءا من اسمه طبعا لحد آخره
فكرت اخد جمل مقتبسه بس بجد لقيتني هكرره كله تاني
فظيع يا احمد.. عايزاك تدعبس وطلعلي الحاجات الفرسة في الاجنبي كمان هتبقى جامدة اوى بس هتحتاج شوية جهد بس معلش دور وانت تلاقي
طبعا فى الافلام العربي اكتر ما يميز الممثلين الحول المطبق.. تلاقي كل واحد باصص عكس التاني وبيكلمو بعض.. معرفش ايه ده
ولا اتنين باصين لبعض فى مرايه ويوريك المصور انهم مش باصين لبعض
ياسلام.. اوعى الاخراج بقى لا مخرج حنكش بصحيح
ولله انا مرة شفت فيلم قديم اوى اول ما السينما المتكلمة طلعت اصلا حتى الابطال كانو من ايام تيتا .. واحد بيموت .. بيموت يا عالم وكل اللى واقفين فوق راسه باصين فى حتت مختلفة ومحدش بينطق.. صمت وحول .. وبس
بس برضه ساعات الاجنبي بيكرر وينقط يا احمد
يعني احنا كلنا بقينا عارفين ان فى اى فيلم رعب البطلة هتفتح التلاجة تقفلها هتلاقي السفاح بالسكينة يقتلها
وعارفين انها هتدخل الاوضة تلاقيها فاضية ويطلعلها من ورا الباب.. مش عارفة بس اماكن السفاح بقت محفوظة اوى
هههههههههههههههههههههههههههه
عامة مرة تانية
البوست ممتع وكوميدي لاخر قطرة
هههههههههههههههههههههههههه
ممتع البوست يا عم المفقوع
بس أكيد شفت جي أى ولا مش فاكر اسمه ايه
أهو ديمي مور
رمز الأنوثة
اتحولت فيه لدكر صرف
!!!
سي يو
عمرو وعمرو
مبسوط بالاضافات اللى قلتوها..نورتم البوست :-)
مى:
الاجنبى مهما كان بيبقى فيه صنعة كويسة، لكن مافهوش العته اللى بيحصل عندنا أحيانا، بالاضافة ان افلام الرعب اصلا بالنسبة لنا عبيطة جداً، احنا عندنا حاجات بتخوفنا اكتر منها :-)
قرنة:
G I Jane
ده الفيلم اللى عملته ديمى مور، واصلا كانت انثى بتحاول تعيش زى الراجل، لكن ماتنكرتش فى زى راجل، ده مستحيل يعنى انت فاهم بقى،
سعيد ان البوست أسعدك :-)
امادو يا جامد ..
ايه المسخرة دى .. عموما الافالام العربى القديمة تحس انهم مش بيمثلو قدام كاميرا .. تمثيلهم كان مسرحى اكتر يعنى تحس ان طريقة التمثيل اصلا فيها حاجة غلط ..وتنقط كدة .. من قريب شوفت فيلم كان عماد حمدى وصباح
كان عماد حمدى قايم بدور محامى تقريبا وصباح كان قايمة بدور واحدة خانت جوزها ..المهم يعنى .. طريقة التمثيل كانت فظيعة .. اعدت انا وابويا نتفرج انا اتفقع وابويا يضحك عليا من خنقتى ..
كان فى حاجات كتير بتفقعنى بس مش فاكرها دلوقتى .. لو افتكرت هجيلك
نورت البلوج يا زوف، وسعيد بمشاركتك الأولى عندى.
طبعاً كان الممثلين زمان أصلا ممثلين مسرحيين لأن المسرح كان سابق السينما طبعاً، وحتى اللى دخلوا السينما على طول ماكانوش شافوا غير الأداء التمثيلى المسرحى، وده كان فى العالم كله مش بس مصر، ملاحظة ذكية يا افندم.
بجد يا احمد الموضوع يجنن ويضحك ومن عنوانه كمان وخصوصا جملة : هو عماد حمدى لما كان بيقول جملته الشهيرة "يا مبارك"، كان عنده بعد نظر سياسى ولا جت معاه صدفة؟
بجد انا ضحكت جداااااااااااا بس يا ابو حميد انت مش جاى على السينما بتاعتنا شوية يا راجل امال سينما دلوقتى تفقع ايه بقى ؟!!!! انا معاك فى كل اللى انت قلته بس لازم تشوف تطور ده دلوقتى عندك مثلا ملاكى اسكندرية قال ايه احنا عندنا فى مصر محامى بيطارد مجرمين وبينط فوق قطار سريع وبيتخانق مع واحد مقنع شوف ازاى ؟ وقال ايه الواد الفتك ده اللى مدوب النسوان بيقع فى حب واحدة كانت متجوزة قبل كده ومتهمة فى جريمة قتل يا سلام والانقح قال المحامى زميله العبيط طول الفيلم وادهم بيعدل عليه هو العقل المدبر وهو اللى مخطط الافشخنات دى كلها طب ازاى حد يقولى يا عالم لما هو فتك كده ومخطط كل حاجة مدفعش عنها هو ليه ؟ الله هو مش واخد منها فلوس ولا ايه ؟!!!! وهوب قال لما راح يعزيه لمح اسمه ورقم العربية ففهم ان اخو مراته جاره ففهم لا يا شيخ والنبى ده مش كلام يفقع ال .... صح ؟ وعموما انا انبسط من الموضوع وده اللى خلانى اخش ارد وربنا يوفقك يا ابو حميد
عمرو الدالى
انت عايز تودينا فى داهية ولا ايه يا عم عمرو انت؟!!!!!!
هاهاهاهاهاهاهاهاهاها
بس برضه اللى بيحصل فى فيلم زى ملاكى اسكندرية ده نمط معتاد غير مزعج أثناء المشاهدة بنشوفه حتى فى أفلام أمريكى كتير ومش بنعترض أثناء المشاهدة، انما الكارثة فى الحاجة اللى تعكنن عليك وتفقع مرارتك أثناء المشاهدة.
Post a Comment