اللعنة على الشتاء

كانت عندى حالة غريبة مخلية نفسى مسدودة عن كل حاجة حتى الأكل، بس ماكنتش مستغرب الحالة دى قوى، عادى دى الضريبة اللى لازم ادفعها، طبعاً مش المقصود هنا ضريبة الشهرة ولا النجاح، دى ضريبة تغيير الجو، لازم تجيلى الحالة المنيلة دى كل سنة أول ما الجو يبتدى يتغير وهى بتمهدنى طبعاً لدخول فصل الشتاء المقزز بالنسبة لى، نبقى قاعدين مثلاً ونحس ان الدنيا برد فنقفل الشبابيك، شوية وحد لذيذ كده يقول لأ افتحوها عشان ده جو عيا وكده لو حد عيان حنتعدى، تقولش حنتعدى بالايدز مثلاً ده دور برد، وشوية حد يقوم يقفل القزاز تانى ويقولك الجو سقعة وشوية حد يفتحها تانى عشان مانتعييش من بعض، وهكذا لغاية ما بيبقى نفسى امسك اى حاجة تقيلة واكسر بيها دماغ اللى قاعدين يفتحوا ويقفلوا دول، مش حاكسر القزاز طبعاً لأنه مالوش ذنب.

واذا خلصت من الهبل بتاع فتح القزاز نيجى لنوع تانى من الهبل، الجو سقعة ماختلفناش، لكن اكيد ان ده مش مبرر عشان نكنسل خروجة، ألاقى حد من اصدقائى الأعزاء أول ما اقوله نخرج النهاردة يصرخ بعزم الصوت ويقول لأااااااااا، انت عايزنا نخرج فى البرد ده ازاى، انت اتجننت؟ مفيش داعى أقول ردى على اللى بيقولى كده لأن الرد بيبقى منافى دايماً للآداب العامة وبييجى فيه ذكر عابر لوالد أووالدة صديقى العزيز ده.

أكيد طبعاً باعانى من دور البرد زيى زى أى مواطن بس المشكلة الكبرى عندى فى دور البرد هى حالة الهمود التام اللى لازم تجيلى وبتقعد معايا بين 24 لـ48 ساعة، وأظن سببها هو تأجيل جسمى لقبول الدور لغاية مابيستحوذ عليه كلية، وساعتها جسمى بقى بيعيش فى الدور مع نفسه، بس الأسوأ من كده فقدانى القدرة على تمييز طعم الأكل، ودى بالنسبة لشخص بيحب الأكل زيى مصيبة طبعاً.

الحاجة الوحيدة الممتعة بالنسبة لى فى جو الشتا لما الدنيا بتمطر، باحب امشى والمطرة تنزل على راسى واغرق هدومى كلها، لكن هل تكتمل المتعة؟ محاااااااال، لازم ألاقى ناس (ماعرفهومش عادة) بيبصولى وزى عايزين يقولوا ايه العبيط ده، وأظن بعضهم بيقولها بس بعد ما ابعد مسافة كافية لضمان عدم سماعى ليها، طيب انا عبيط عشان بامشى تحت المطرة انت بقى مال أهلك ماتخليك فى حالك تحت السقف اللى انت واقف تحته، يارب يقع على دماغك انت واللى زيك من اللى مابيحبوش المطر، قولوا آمين.